Er ásættanlegt að lífsbjörg þúsunda sé rænd með gengisfellingu ?

Er eins og væntanlega þúsundir manna í þessu þjóðfélagi í eins konar áfalli yfir þróun mála á Íslandi.  Þessi öfluga ríkisstjórn ( með ríflegan þingmeirihluta ) situr aðgerðarlaus og lætur ræna íslensk alþýðuheimili án aðgerða.  Seðlabankinn hækkar og hækkar stýrivexti sem fyrst og fremst bitna á þeim heimilum sem eru með innlend lán.  Allir sem geta og hafa til þess aðstöðu eru að hækka allt milli himins og jarðar.  Verkalýðshreyfinginn virðist vera hálf lömuð eða þemum verra.  Af hverju er ekki boðað til allsherjar útifundar á Lækjatorgi við Stjórnarráðið þegar ríkisstjórnin fundar til að ýta við þessu fólki.  Það er ekki ásættanlegt nokkrum dögum eftir er að búið er að gera kjarasamning við 80 þús. manns að búið sé að ræna hækkuninni í formi gengisfellingar.  Seðlabankinn hefur ýjað að því að bankarnir hafi tekið þátt í áhlaupi á krónuna, en þeir munu eiga 650 miljarða í erlendum gjaldeyrir.  Þannig hafa þeir fengið gífurlegan hagnað í formi gengishækkunar.   Gengissig krónunnar eru manna verk ekki náttúruhamfarir.  Það situr fólk við tölvur og býr til þessa stöðu með ásetningi.  Ég sætti mig ekki við að fólk út í bæ geti látið allt blæða hér út, til þess að græða á gengisfellingunni.  

Ég er hér með sönnun þess hvernig fyrirtæki og aðrir eru að græða á þessu ástandi.  Þurfti að skipta um ofnkrana sem var orðin ónýtur og fór í Húsasmiðjuna til að fá nýjan.  Þegar ég er búin að finna kranann ásamt afgreiðslumanni þá stendur að kraninn kosti 1500 krónur.  Miðinn var á hillu þar sem kranar voru geymdir.  Ég spurði því næst afgreiðslumanninn hvort þetta væri ekki örugglega verðið, en hann neitaði því og sagði að þeir væru að hækka allt í dag (þriðjudagaginn 25. mars, fyrsti opnunardagurinn eftir páska ) og í ljós kom að hann átti að hækka úr 1500 krónum í 1995 krónur, eða um 24,85%.  Þetta er ríflega gengisfellingin.  Ég mótmælti þessu en afgreiðslumaðurinn sagðist ekki geta selt mér á hilluverðinu, þeir hefðu ekki komist yfir það að hækka allt.  Það var skíringin.  Þannig reiddi ég þessa upphæð af hendi við kassann og þar sem ég þurfti að kaupa tvo krana kostaði þetta mig 990 krónum meira eftir þetta gengisfellingarrán sem ég vil kalla.  Þetta er örlítið dæmi um það sem er að gerast.  Rök verslunarmanna heyrði ég að þeir værum með erlend innkauplán og þess vegna verði að hækka vöruna.  Fyrir mér er hilluverðið eini rétti mælikvarðinn á verðinu á vörunni, svo einfalt er  það.

Húsasmiðjan og BYKO eru leiðandi fyrirtæki á byggingarmarkaði og nærri lætur hvað svona hækkun hefur mikil margfeldis áhrif.  Þannig mun þessi hækkun hækka byggingarvísitölu sem aftur hækkar svo aðrar vísitölur sem taka mið af byggingarvísitölunni.  Lán allra landsmanna munu því hækka þar sem þau eru verðtryggð með þessum vísitölum.  Með þessu er verið að stela lífsbjörg þúsunda íslendinga sem horfa á þennan hrunadans sem er tilbúin af fólki sem getur keypt og selt gjaldeyrir að vild og veik krónuna þegar því sýnist.  Jöklabréfin eru líka hluti af þessum hrunadansi. 

Verkalýðshreyfingin verður að koma niður Lækjatorg og sýna ráðamönnum að við þetta verður ekki unað.

Krafan er að ríkisjóður hækki persónuafslátt strax, en ekki á næsta ári og það meira en einhvern 2000 kall.  Þá verði gripið til aðgerða sem verja kaupmátt almennings þannig að nýi kjarasamningurinn standi og verði kjarabót eins og til stóð.  Þá er það krafa að öll spil verði lögð á borðið og því lýst nákvæmlega hverjir voru að veikja krónuna. 

 

 

Kvittun sem staðfestir hækkun á krananum.

 

 

 

 

 

 

  Þetta er verðmiðinn sem ég fékk að mynda á símann minn til að staðfesta hvað var hilluverðið.

 

 

 

 

 

 

 

 

 

 

Athugasemdir

[Marta B Helgadóttir, 27.3.2008 kl. 20:27]

Mjólkurlíterinn kominn úr 81kr í 100 kr frá og með 1.apríl. Það er ekki bara gengisfellingin sem át upp kjarasamningana það er ýmislegt fleira sem er að skerða hag launafólks og það er að gerast mjög hratt. Verst er að fólk virðist ekki gera sér grein fyrir þessu og eyðir sem aldrei fyrr.

[Marta B Helgadóttir, 27.3.2008 kl. 20:28]

...leiðretti,  líterinn er á 87 kr og fer í 100 kr

[Marta B Helgadóttir, 27.3.2008 kl. 20:43]

Yfir í annað:

varstu búinn að sjá þetta Ólafur?:

http://godverkasamtokin.blogcentral.is/blog/2008/3/27/malum-baeinn-hvitan/ 

[steiner (IP-tala skráð) 28.3.2008 kl. 11:32]

já verðbólgan stígur þrátt fyrir að seðlabanki hækki vexti, hann virðist vera búinn að tapa stríðinu við verðbólgudrauginn í bili og gengisvísitalan er komin á sama stað og fyrir páska,, en ég prísa mig alla vega sæla að drekka ekki mjólk:)

[Soffía Sigurðardóttir, 28.3.2008 kl. 11:35]

Þú átt skýlausan rétt á því að kaupa vöruna á því verði sem hún er verðmerkt með í versluninni. Ef annað verð er í afgreiðslukassanum en verðmerkingin segir til um, átt þú að fá afslátt sem nemur verðmuninum.

[Rúnar Birgir Gíslason, 28.3.2008 kl. 13:10]

Er ekki málið að aðgerðir Seðlabanka virka ekkert á Íslandi því fólk/kúnnar halda bara áfram að versla/neyta sama hvað hlutirnir kosta.

[Landfari, 29.3.2008 kl. 00:18]

Held að það sé rétt hjá Soffíu hér á undan að þú átt rétt á því að kaupa vöruna á hilluverðinu. Það er bannað að hækka við kassann.

Hef lent í því oftar en einu sinni bæði hjá Bónus og Krónunni og það hefur verið leiðrétt umyrðalaust.